It's Party Time~

又係時候開party喇....預左你喇!
日期: 2007年12月22日
由於係聖誕party，所以有幾項事情要注意:
1) 請帶一份不少於50元之禮物 (我地玩交換禮物 ^_^)
2) 我會準備零食同飲品，但亦歡迎你地買d黎幫補下家計，多多益善，少少唔拘。
3) 我到可以開到2枱麻雀，同會有Wii。請自備boardgame。
4) 預計大家都會係之前做節，所以party係9:30後先開始，係咪諗得好周到呢....

現在confirm出席名單:
1) 我 :p
2) Ana
3) Jeffrey
4) Jeff
5) Ricky & Mabel
6) B
7) Maggie
8) Queenie

快d同我報名喇!!

泰國4天遊-飲食編

今期為大家介紹既就係泰國曼谷飲飲食食。我地一到步就去左我2年前去過既寅次郎食日本餐。你睇下幾正 :p

第二晚就去左Mango Tree到食泰國菜。首先叫左一杯比我同Ana仲甜既奶茶。泰式奶茶真係超..........甜。唔係太接受。

之後就叫左咖哩炒蟹。但係我覺得唔夠spicy...唔夠野味....

最後果晚我地就去食海鮮大餐。叫左蝦、蟹、魚同魚翅.....一於豪食一番...

最後食埋燕窩.....飽住個肚咁返酒店....

泰國4天遊-住宿編

兩個星期前，我同輝輝+Ana+Calvin一齊去泰國曼谷旅行。因為年頭果時Airasia有零機價機票，所以就匆匆忙忙咁決定左今次之旅。係出發前做左好多research。搵左一間中價酒店。六百幾蚊一晚，係十月中先開張既Pullman Kingpower Hotel。我地四個人對於酒店贊口不絕。等我續一推介比大家啦

電梯個按鈕係藍色架....好in...

我地住521號房

泰式既床

最特別既係...係床邊有道門可以睇到廁所...咁咪會好易比人偷窺?

係廁所到望返出黎.....

我搵到條魚仔呀!!!

原來條魚仔係比d客人沖泡泡浴時玩既....我特登開左盆水比佢游游游~

唔係呀嘛....衣櫃都可以望到個廁所?但尼個設計都幾好吖....沖完涼可以直接係衣櫥攞衫....

係張書枱到prepare下一陣去邊先

我間房可以望到個空中泳池架...正

好大既lobby....d staff仲好nice 添

係酒店門口同輝輝整張合照先

今次介紹完住宿....下回講下我地食左咩啦~

旅行

我去旅行喇....10號返黎架喇....

恭喜

11月6日。收到你的好消息。恭喜晒。你要好好保重身體呀! 我會成日提點你架喇........ hehe...

救人一命

2007年10月19日，我同輝輝一家係八百伴行完街街後，渣車車送姐姐返屋企。我地回程時經過下環街，塞塞地地車，係到等紅綠燈果時，有個手抱BB仔既女人走出黎，同我地講截唔到車，個BB仔又發高燒，希忙我地可以車佢去醫院。輝輝諗都唔洗諗就叫左佢上車。我開頭都驚驚地因為唔會唔會係D咩咩黨。不過唔夠兩秒就定落黎，仲同自己講:"車，驚咩姐，輝輝係阿SIR架!"。上車既係一個女人、一個男人同人個BB仔。輝輝好心急想車佢地去山頂，我就有少少擔心佢渣車心急得制會危險。係車到聽到佢地講，原來車入既女人同男人係個BB既女麻女麻同爺爺。個爸爸同媽媽要返工冇時間照顧BB....個爺爺打電話比個爸爸叫佢盡快帶個BB個身份證同睇醫生要既野去醫院，個爸爸好似唔係好理咁....收左線之後個爺爺講左一包:真係冇人性架! 而個BB就發燒發到唔出聲，一味係到喘氣。唔夠一陣膚係佢個頭個冰袋都溶晒。個BB仲係途中嘔添!!! (好彩冇嘔到架車到).....臨落車個女人話比返錢我地，我係超人黎架嘛，行俠仗義係我地既職責，梗係冇收啦。不過見到個BB咁，我同輝輝都估佢爸媽係做荷官....因為要返夜班所以冇時間湊個BB....個BB其實好得意架...希望佢冇事啦!

M記新玩意

早兩日去M記買野食....見到有得換字母熊，所以就買左一隻比輝輝。咁岩Jeffrey有個攝影棚...就用佢做左個試驗。影出黎都幾得意丫....等下個星期出埋個K字買一個比自己先......

我自由喇....

四年苦讀 (其實冇咩點用功過)，

係今日終於完成答辯部份。

正正式式完成碩士學位~~

真係可喜可賀~~

讀完一個咁冷門既學位，

唔知以後會唔會有人識欣賞呢?

It's Party Time!!!!!!!!!!

終於可以攪housewarming喇，大家係咪期待左好耐呢?

日期: 2007年9月22日 (星期六)
地點: 我新屋
時間: 晚上8點
有咩玩: 麻雀、Wii、啤牌、board games......
邀請名單: 你覺得你自己係就係架喇 ^_^
已確定出席名單: 我、輝輝、Ana、Jeffrey、Maggie+囡囡、Mabel、Ricky、Betty、Leslie、阿B、Beverly、Sarah、Jeff、Sophy、Antonio+Carol......

有咩要準備? 記得帶錢囉，因為打麻雀我會贏晒你地d錢....hohoho.....

仲有咩要準備? 咪就係盡情玩囉!

I'm back~

話咁快我就返黎喇....雖然唔係有咩特別野要做....但係又坐車、又坐飛機，都幾攰下.... 所以一返到澳門就大訓特訓.... 接下來尼兩個星期我要閉關呀.....因為我既"學業最終回"係定左係19號....今鋪唔係你死就我亡...... 加油!加油!加油!

又出差喇...

我又出差喇~ 係今年第三次出差。今次係去貴州。沖沖而去，沖沖而回。唔會有機會有時間玩架....所以都未必可以買到手信比大家lu....

醜屋大翻身

早前睇左一套韓劇叫醜女大翻身，覺得用黎形容我間屋都貼切，於是寫尼個post用黎紀念下裝修前後既改變。
2007年5月12日正式開始裝修，8月5日正式入伙。

前 後


書房

- 書房以粉藍色為主，因為尼間房亦名為"大口仔"房。因為我會放好多好多大口仔物品入去。但而家已經比輝輝放左好多佢既影碟係入面，6格書架比佢霸左5格......

前 後


飯廳

- 飯廳張枱可以變成一張圓枱，方便多d人黎玩時使用。

前 後

客廳
- 本來有成地紙同垃圾，而家就放左電視

前 後

廚房
- 其實廚房冇咩整過，都係清潔返佢...起碼我唔會係廚房掠衫先......

前 後

客廳

- 原本有個雪柜但我"dum"左lu...而家放左一張白色sofa.... 好有 "家"既感覺




前 後

主人房

- 原本既主人房真係好恐怖。成間房都貼滿報紙，因為用黎當窗簾。而家就貼左一隻韓國格仔牆紙，再加一張超大床。即刻舒適晒。




前 後


K房 /AV房

- AV房尼個名始終好似好三級咁，所以我一般都會叫佢做K房。以深綠色加白色既牆為主。用途? 咁用黎打麻雀同唱K囉。不過唱歌設備仍在添置中。要遲d先可以開放。

有關我新居既其他照片，可以入去我既photo album到睇啦!

入伙喇~~

2007年8月5日(星期日)，我同輝輝既新居終於入伙喇。不過係尼到都澄清一點:我冇搬入去住架...只係輝輝一個人住...


因為仲有好多野未添置，所以暫時都未能招呼各方親朋好友黎housewarming。預計九月初就會舉行好多場party...計一計....六七場都冇走雞...


新屋入伙既第一個星期五，我選擇左係屋企同輝輝撐抬腳，我要求親自落廚....雖然輝輝對我冇咩信心，但都比我試下，大不了一齊食公仔面。我地係supermarket買左牛排、雞亦同面包。因為我唔係好識整中餐，所以煎牛排會係好隱陣。最後，我整左煎牛排、可樂雞亦同蒜蓉包。睇下我既大作:
我地仲開埋紅酒添，係咪好識嘆呢...哈哈...輝輝對我做既晚餐好滿意。上圖為已食左一隻雞亦同一啖牛排....我對我自己既表現都好滿意 ^_^

下次整咩比輝輝食好呢?

發夢......

尋晚發左個夢....個故事到而家都好清晰...所以特別地記錄下來。

故事一開始就係我坐係一架深藍色的車內，停泊在一個好多小偷的地區。輝輝唔知咩原因落左車...得番我一個....我坐係車到一陣....決定落車入去超級市場行下。但係好大意咁留左個LV手袋係架車入面。手袋入面梗係仲有我個銀包、錢同証件啦。我入左supermarket係到睇d衣物柔順濟減價。突然醒起放個手袋入架車入面會好危險。於是返回架車睇下。點知.......成架車唔見左喇!!! 係條街到企左一班人，有男有女。但係都係講英文既人，我在好心急既情況下用英文問果幾個多見唔見到一架藍色既車。有一個女人話見到....仲話帶我去添.... 我一心梗係諗住，就算冇左d錢都比返d証件我啦....於是就跟左佢行。行左一陣，我諗諗下都係覺得一個女人好危險，所以用我身唯一既物品 --- 手機，打比輝輝話佢知我去左邊......點知個女人見到我打電話就想搶左去.....於是我地就一番爭扎....就咁就醒左lu.....

我個夢係咁好完整呢? 就係因為咁清晰、咁完整，所以我尋晚係訓得唔好架.....返到公司都覺得好眼訓......

幸運字 - 升

我今日既幸運字係一個"升"字。因為今日有兩件事發生同個"升"字有關。第一件事就係d基金又升左喇...真係可喜可賀，第二個"升"字就根我尼d"打工仔"有關既。但由於仲要過五關斬六仗，所以都係賣關子先(不過聰明既你都估到d架喇...)。仲知今日就係好日子啦 ^_^

我家有個小明星

話說我早兩日先知我係香港既表妹同Stephy影左一輯poster.....尼張poster係幫奧比斯拍既，目的係向全港校園推廣救盲同埋護眼訊息。講到重點，係咪好想知我表妹係邊個尼....就係企係Stephy右手第一個呀.... 都唔明點解我d表妹個個都咁靚.... 攪到好多人都好想叫我做表姐 :p.......而家尼張poster係香港各大地鐵部可以見到....而睇真人就要等8月尾喇....

新屋差唔多喇

我間新屋已經裝修左兩個月喇....而家都七七八八，只要放埋d家俬入去就大工告成，我諗8月大家就可以黎玩喇....尼兩日都好比心機咁係新屋到打點....星期六、日都要一早身，但係係值得既。因為睇見d燈飾同家俱都配搭得很好.....心裡很滿足。原來裝修真係要經驗，同埋要同d師傅溝通得很好。因為佢地唔會知你想要咩效果..... 舉個例子比大家。我飯廳有一個長型的燈同一條射燈路軌。d師傅好自然既諗法係燈同路軌係平行咁放.....但佢地唔知道因為我買左一張長既食飯枱，所以應該跟住張長枱咁放盞燈先係正確....放是又要重頭安過盞燈lu.... 又例如我比條窗簾路軌比師傅，佢地唔會知有d係放係天花線之上，有d要轉彎....，有d要裝三層 (一層沙、一層布、一層窗頭)...... 我尼兩日覺得自己留係到陪d師傅開工好有價值.....但係個人就攰到訓唔到.....因為係d師傅整野既既同事我就係到掃地....尼兩日可以算係我一生中掃得最多次地既兩日....

Annual Ball of Mother Club

上個星期參加濠江扶輪社的慈善舞會及第二十八屆就職典禮，個function係永利舉行，都幾grand... 不過係個function開始之前就好亂囉，有好多野都冇人知道要點做，幸好最後都可以順利進行，而我同shadow就企左成晚係到幫手......隻腳都不知幾痛。個兩位男士就舒服得多....不過唔係佢地既錯.... 係大會/PR公司 (?)既安排有d唔恰當。佢地唔應該歧見男性，下次記得爭取上台幫手既機會喇 ^_^

大家唔知有冇留意，尼期開d賭場入面d ballroom都係以黃/金色為主，漁人碼頭同永利都係黃金金....攪到影d相出黎d效果唔係太好.... 其實由於年紀開始大的關係，有時都會諗下自己如果結婚會係邊到擺酒。以前大部份d朋友都會揀觀光塔....因為以前冇其他choice嘛，但而家有d plan緊結婚既朋友就鐘意漁人碼頭，因為冇柱擋住個台....一眼睇晒....... 但係睇左好幾間.....我自己都係覺得有柱唔緊要...最緊要係影d相係靚，因為只係得一次機會比你影。

敏感

呀......好慘呀!....

我唔知食錯咩攪到皮膚敏感......最慘就係生係塊面到....而家有半邊面生到一舊一舊咁....好核突...
尋日諗住睇一日睇下佢會唔會散.....點知....今日已經生到耳仔都有....而家好似隻豬耳咁....唔制呀....

我星期六仲要去ball添架.... 真係唔想見人....

ps 輝輝送左一首歌比我 :

曾和誰吻著那記憶真太深

似是某些舊戲震撼至今

仿似身歷其境場面重溫

唇上那些味覺溫度多迫真

(鄭伊健: 吻感)

香港電腦通訊節2007

香港電腦通訊節2007

http://www.hkccfexpo.com/


大家有冇興趣去呀?

改名...

今日係6月4號，係一個好特別既日子.....唔係因為今日要紀念64事件，而係我既好姊妹霍姑娘牛一。係尼到祝佢生日快樂.... 禮物就有拖冇欠....

今日唔知做咩鬼，打email時打自己個名成日都打錯成Krain。跟住同同事講講下又覺得尼個名又幾有型... 可以用黎做網名.... 點知我同事話如果我鐘意可以日日叫叫Krain。我都係鐘意我而家個名多d... 諗諗下...可以第二時做我個仔/女個名都幾好喎....又特別....又有意思 (因為係又我個名演變).... 跟住我同我同事就開始左玩名遊戲....Ranki, Karin, Kanri, Narki,.....都有幾多變化.... 真係可以認真考慮下...

生日快樂to me!!!

尋晚12點後就陸陸續續咁收到各方好友既生日message...係尼到同大家講聲多謝! 今年既生日會係比較平淡中渡過...因為一來要返工、二來輝輝都唔得閒同我慶祝、三來今日係weekday....所以今年冇一個個人既生日party lu...

以下就是我生日收到的禮物:
霍姑娘既一套床單套裝
輝輝既cheese cake 同 頸鍊
細老既一部 Wii
表妹送左米奇同大口仔禮物一堆
ceci送既chocolate
奶奶比既利是
中午我d同事請食飯
晚上爸爸話請打邊爐
Anton哥、阿妹、Jeffrey、CTM同捐血中心 既祝福message
雙子金牛夜party...
好友的祝賀電話...

多謝咁多位...

我今日生日大晒呀....打電話比我我唔洗錢架....得閒話打比我啦....唔好浪費ctm對我一番既好意嘛 :p

台灣四天之旅

我又去旅行喇...今次去台灣....今次既旅程好特別，因為係我第一次跟濠江扶輪社一齊去交流...除左交流同參觀外，仲有機會入住六星級溫泉酒店...好期待呀...

ps. 輝輝唔會跟我去架...大家記得係幫我目及住佢呀 :p

廣告時間: 至野領袖訓練營

濠江扶輪青年服務團將於2007年5月19-20日舉行 "至野領袖訓練營"的宿營。詳請如下:

活動: "至野領袖訓練 營"
時期: 2007年5月19-20日 (兩日一夜)
地點: 路環飛鷹培訓基地
內容: 團隊遊戲、 捉魚、夜行、槍械認識、野戰等
費用: 濠江扶青會員: $130
非會員 : $150
名額: 20人 (額滿即止)

當日本會將安排來回巴士往返營地。
請各位於2007年5月11日前報名!

如有疑問可聯絡本會會務Shadow (shadowkeita@hotmail.com) 或本人查詢。

另有詳細活動流程，大家可留電郵給我，我會email給你!

請大家多多支持!

又中獎喇...

哈哈...今年真係超lucky....我今日又中獎喇...

事由我今日參加我爸爸個會既會慶，當然因為有抽獎先去啦。舊年我細老中左部手機。今年我地又有去...因為唔夠坐我細老坐左等二張枱。一開始輝輝就中左個圍獎: 毛巾。之後陸陸續續咁我阿女麻、阿姨、阿伯等都中左d金牌、風扇、咖啡機等.....在最後三個獎時...都冇我地張枱既號碼...點知...坐隔離枱既細老跑出...佢中左三獎呀...三獎係洗衣機一部...我即刻為佢鼓掌，因為我知道尼份獎品一定會比左我.... 因為而家只有我最需要洗衣機... 買左屋...咩電器都冇...所以無論咩電器都岩我...佢領完獎之後就二話不說就比左我...個天真係識做...繼中一千蚊廚具禮卷之後又力作...個洗衣機仲要係panasonic添...幾靚架...咁又慳返一樣電器...唔知幾時可以中埋雪柜、電視機、焗爐......

大家睇下我份禮物:
http://www.panasonic-hk.com/ha/productdetail.asp?section=HS&category=WM&language=chinese&productID=NA-F55A1P&count=9

電腦網絡真偉大...

我今日好開心呀...因為我同我失散左好耐既加拿大朋友contact返喇....自從我2002年係加拿大返黎澳門之後就冇搵過我係加拿大d friend...點解? 因為冇左佢地個email囉...以前用既icq漸漸被人遺忘...而因為改用近年興起既msn所以冇左好多contact....一別差唔多有5年...同我一齊度過我係加拿大6年時光既朋友再次聯繫返....真係好開心...同有d感動...因為佢話比我知我地其中一個朋友將會係下年3月結婚。我而家既心情真係無法形容。只係好想好想可以下年返加拿大參加瑪莉亞既婚禮。

其實返左澳門之後有好多次想搵返佢地個contact...例如係friendster入下佢地個名試下佢地會唔會都有register。但都係no result。估唔到我尼個朋友經佢個男朋友係香港既朋友(我都識尼個朋友)搵到我個email。就係咁再次有返聯繫。原來佢地冇忘記我....我又多返一班朋友喇....

我尼一刻非常之掛住我在加國老友: Michelle, Leslie, Angel, Gelaine, Maria, Edward, Andrew, 方包等... 朋友們...您門好嗎? MISS U ALL SO MUCH!!!

如果你地見到我個blog就記得留言同問米雪攞返我個msn喇....

風水

今日請左個風水師去新房到睇下，因為自己都上網check過，見到果到d房其實對身體會唔係幾好。既然有朋友有睇開風水既習慣，就即管叫佢介紹睇下，等個人安心d... 睇完之後都冇咩覺得唔好...而且要化解的方法亦很簡單。都係放下盆栽、check下個床頭、書枱放係邊好....師傅仲話左個生仔位比我聽添...哈哈....都幾攪笑...但係果間房而家plan黎做娛樂房。要生仔先擺果個陣...

最近情況

最近少左寫blog...原因好簡單: 懶。 亦由於尼排有好多野做，又要做扶青d野，又要返學寫埋編論文，又要準備一個好重要既考試，再加有壇野好煩，所以留返d時間去作戰所以冇寫到。我尼期煩咩?咁就係我間樓囉...其實我間樓已經係上個星期二簽晒所有文件攪掂晒架喇...但由於個地產做左好多野令我好唔like所以先至咁煩...我同地產有排抗戰。因為成件事既經過實在太複雜，等我心情平復後再同大家討論。但有一點要忠告大家:千萬不要幫襯"米聯"。本人就係身受其害。詳情有待下回分解。或者大家可以約我飲下午茶講比你聽 ^_~

香港人點睇澳門人...

有個朋友send左條link比我...係一段香港既電台既節目訪問....裡面提及香港人點睇澳門人...佢地不停係咁採澳門人...真係好奇怪....亦好唔明點佢地以咩心態去講出d咁既野....大家都係中國人...點解要咁做呢....

http://www.rthk.org.hk/rthk/radio2/89/20061208.html

濠江扶青保齡球比賽

『友誼碌爆樽III 』保齡球比賽 四月十五日 星期日 早上十時 佳景保齡球館

比賽內容 : 是次比賽分為八支隊伍，每隊四個人。
參加之隊伍須繳交澳門幣四拾元正作報名費用。

獎項: 團體最高積分獎設冠、亞、季軍三項。
冠軍－ 300 元禮劵及獎狀
亞軍－ 200 元禮劵及獎狀
季軍－ 100 元禮劵及獎狀
個人最高積分獎　－ 100元禮劵及獎狀
每局積分最接近88 分獎一名　－　 50元禮劵及獎狀

比賽規則 : 各參賽隊伍須於當日早上十時到達，逾時作棄權論；
- 本會於當天將提供約三十分鐘賽(一隊一局 )的賽前練習，其他一切賽前練習費用，由各隊自己負責。
- 抽簽定賽道；
- 各參賽者亦可自備保齡球及球鞋；
- 參賽隊伍每位女士每局可加十分，其餘計分方法按一般比賽規則；
- 各參賽者每人各自完成一局，即每隊共打四局；
- 比賽完畢時，以四局的累積總分最高之隊伍為團體優勝者；
- 團體積分有同分者，則需每隊四人各打一球決勝負；
- 個人單一局數最高積分獎，則以每人在團體賽時單一局的積分最高者為優勝。如同分者，則要打多一次（即最多兩球），積分最高者為優勝
- 比賽規則解釋權及評判結果以本會最終決定為準。


註: 敬請於4 月12 日 ( 星期四) 前把填妥的回條電郵至kiranlei@gmail.com 。額滿即止。

多謝大家的支持!

~.~.~.~.~.~.~.~.~.~.~.~.~.~.~.~.~.~.~.~.
Kiran Lei
濠江扶輪青年服務團
團長

數學推理

無意中係個路人甲既blog到睇到尼段數學推理...覺得好攪笑...但邏輯上係岩既...比大家笑下:

人=吃飯+睡覺+上班+玩，豬=吃飯+ 睡覺。
代入上式則得：人=豬+上班+玩，
即是：人-玩=豬+上班；
結論：不懂得玩的人=是隻會上班的豬。

男人=吃飯+睡覺+掙錢，豬=吃飯+ 睡覺；
男人=豬+掙錢，豬=男人-掙錢，所以男人不掙錢等於豬。

女人=吃飯+睡覺+花錢，豬=吃飯+睡覺；
代入上式則得：女人=豬+花錢， 移項則得：女人-花錢=豬；
結論：女人不花錢的都是豬。

綜合以上：男人為了讓女人不變成豬而掙錢，而女人為了讓男人不變成豬而花錢；
是故，男人+女人=兩頭豬。
^_^

昆明遊

四日既假期就咁就結束lu...尼個旅行因為有輝輝陪我既關係所以特別好玩...其實昆明冇咩特別好玩...但都去左好幾個地方參觀

第一日:
下午四點幾到左機場，一出閘就有人介紹d酒店同旅遊團比你join。經過一輪了解後，我地join左一個石林一日遊團，包車包一餐同入場卷...因為石林入場券都140蚊所以覺得200join個團都ok啦...到酒店check-in後，我地就去食大大碗既雲南米線lu...

之後本來諗住去圓通寺同昆明動物園行下，點先去到都冇得入lu..於是我地問仲有冇櫻花睇啦...果到d人話謝了...好失望好失望...因為以為冇得去日本睇可以係昆明睇架嘛...點知都係冇...

摸完門釘後我同輝輝決定唔搭車...一路攞住個地圖周圍行...一路行返酒店...沿路經過都幾出名既翠湖...但原來有一邊已經係死水...一d都唔靚...d書上寫既都係誇大既...

係門口有人賣花...輝輝買左一札送比我...sweet sweet...

晚餐係一間叫"一米陽光"既餐廳食飯...三個字黎形容: 好難食。我地叫左三樣野: 三鮮湯，一米陽光伴飯同雞湯泡飯...三鮮湯就係下面尼一碗，用菜、蕃茄同火腳做成...一d味都冇...好似飲滾水...淨係個個雞湯泡飯好食d...

第二日:

一大清早就起身，因為join左個石林團嘛，早餐都趕唔切就要上車...坐左成二個鐘頭早終於到喇...去到冇想像中咁壯觀...但都好靚...我地個導遊帶住我地行左好多路...d路好難行...一直咁行上山...好累...睇下下面張相!! 輝輝同一個昆明姑娘影相呀!!! 你地睇真d..其實係我黎架...好核突...尼個look都係唔係幾岩我...

第三日

去左昆明動物動睇動物。因為尼期不停由玩"zoo keeper"的關係，所以好似上左身咁...不停咁同輝輝講: 快d去睇熊貓啦...佢嬲喇...。輝輝亦不示弱咁話大笨象嬲...兩個人好白痴咁一路行一路玩....終於行到我地最想睇既櫻花區喇....不過只得一兩棵櫻花樹...但總好過冇...等一時間搵個靚位影相....

之後就走左去世博園....一入場就見到個大花園...好靚呀... 因為去到已經成4點幾5點，所以不停有人撩我地座佢地d旅遊車遊覽，仲可以收平我地添...因為lazy..所以講價後以100蚊2個人坐佢地個車仔帶我地行...仲有個私人導遊幫我地介紹添...

第四日

一早就作最後衝刺睇埋金殿....去都係因為佢有個特別既歷史背景。係入面講左好多吳三桂同陳圓圓既故事.... 我都唔鐘意聽history既....所以都係行下就算lu...

四日既旅程就咁結束lu...下次會去邊呢?

新發現

識我既朋友都知道我既名係幾特別.... 我個名真係一個名黎架 (唔係造字并架) ...尼個名最普遍係咩國家既人用呢? 以我所最多都係伊朗、伊拉克、印度 等果d黑"文文"人用多....重要係男仔名添.... 我以前係英國交流時亦有一位愛爾蘭老師同我講愛爾蘭都有用尼個名.... 今日我去接見一個印度客人，佢一見到我個名就問我知唔知印度都有尼個名，我梗係知啦....佢仲讚尼個係一個好名，因為個意思係"sun rays" .... 嘩...個意思都幾好喎，好似好有朝氣咁...幾岩我吖...所以話改名係好緊要...你睇下我咁"朝"........(即)就知啦.... 最後我係同佢正實左我個名係印度係女仔名黎架....呵呵呵....

節目預告

我會係23號-26號期間去昆明呀... 大家唔好掛住我喇 .... 我會影d靚相比大家睇架喇.... ^_^

甜蜜的鈴聲...

一個星期前，輝輝send左一段鈴聲比我，佢仲叫我用尼段鈴聲。當時我冇理佢...因為我都唔識果首係咩歌...佢話係佢同事部機到copy過黎... 因為我唔知幾時開始有個習慣，就係煲完一套劇(especially台灣劇)之後就會鐘意用入面d歌做鈴聲...所以我冇理佢....但原來背後係一個好sweet既故事....

聖誕節果時...我將我個手機換左隻聖誕歌....過埋新年都仲係用緊尼隻歌.....於是上幾個禮拜，我好隨意咁同輝輝講過我想換鈴聲.... 但一直冇咩歌令我覺得好鐘意...

自從我舊年年尾煲爆左部dvd機之後，就冇再煲劇。有好幾次想買機又驚自己又會沈迷煲碟所以一直由得佢... 直至最近返大陸... 輝輝照例去掃碟... 我好想買d劇返去煲...但冇機所以諗住唔買，點知輝輝原來有多一部dvd機係屋企...一直都唔記得...於是我既煲劇生涯又反返黎喇...一次買左兩套新劇:花樣少年少女(吳尊同SHE既ella演)同埋轉角遇到愛(大s同小豬演)。

煲左花樣少年少女幾日後...我覺得個片尾曲幾好聽...於是就down左佢落黎....仲cut埋做鈴聲添... 尋日放工輝輝黎車我... 我係車到set返個電話鈴聲....仲話比輝輝聽隻歌 "專屬天使"幾好聽.... 點知....
我發現我個鈴聲list到有兩個"專屬天使"既file..... 先知道....原來佢一早就send左比我.... 我真係好surprise.... 原來佢唔知係邊到得知尼隻歌係"花樣少年少女"既片尾曲.....佢又知我係到煲尼套劇...又會預先估到我會鐘意尼首歌......我真係超開心....大家可能覺得好傻...甚至好無聊....但對我黎講發現你的另一伴默默地為你做左d野氹你開心...雖然係一件少事...但係佢份心意真係令我好感動.....女孩子...就係咁容易感動.....

專屬天使 主唱: Tank

我不會怪你　對我的偽裝
天使在人間是該藏好翅膀
人們愚蠢魯莽而妳纖細善良
怎能讓妳為了我被碰傷

小小的手掌　厚厚的溫暖
妳總能平復我不安的夜晚
不敢想的夢想　透過妳的眼光
我才看見它原來在前方

＊沒有誰能把妳搶離我身旁　
妳是我的專屬天使　為我能獨佔　

＃沒有誰能取代妳在我心上　
擁有一個專屬天使　我哪裡還需要別的願望

小小的手掌　大大的力量
我一定也會像妳一樣飛翔
妳想去的地方　就是我的方向
有我保護笑容儘管燦爛

要不是妳出現　我一定還在沉睡
絕望的以為　生命只有黑夜

廣告時間: 濠江扶輪青年服務團三月份例會

等我宣傳下個會d活動先...

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

各位:

濠江扶輪青年服務團三月份的例會將於2007年3月16日 (星期五)於綜藝館舉行。詳情如下:

日期: 2007年3月16日
地點: 綜藝館青年中心二樓會議室
時間: 晚上8點
講者: 張文壇 (Tan)

互聯網已成為我地生活中的一部份，無論在工作返學所用到既yahoo, goggle search、甚至娛樂所用到既msn, blog, youtube，都離不開互聯網。
三月份的例會我地邀請到Tan為我地講下互聯網上市場機會、網站的發展等。希望啟發大家在互聯網上把握商機。

請各位於2007年3月15日之前報名。

***屆時我們會叫外賣，一邊吃晚飯、一邊交流***

poster:

年頭有好運 ^_^

大家重記唔記得我之前有個blog講輝輝係情人節送左隻鑽戒比我尼..... 尼隻鑽戒不但氹到我好開心...仲帶比我好運添... 講返尼隻鑽戒既來原.... 其實係係八佰伴到買既.... 買完之後我都有"鵝"輝輝點解去"明知貴"既地方買介子.... 但都買左...梗係唔好"sid".... 我梗係要上頂樓換埋張抽獎卷博一博都好呀.... 男人...就係怕麻煩....連換張飛都唔想換....我梗係唔制啦.... 於是張手頭上十幾廿張飛一張一張咁寫名.... 放落抽獎箱果一刻我係有仲感覺:我係會中獎既!! 之後到左公司既春明... 我成個辦公室10個人有6個人中獎 (唯獨係我冇!!!) 返到公司我仲同我d同事講: 公司d獎唔靚我唔要，我好有信心等11號八佰伴開獎...我一定會中既。於是今日趁lunch果時上八佰伴個homepage到睇下...結果....

我中左第二十二獎呀!!!
第二十二獎: 廚具禮卷1,000元

廚具禮卷....岩晒我!!!
上天更係知我買左樓....新屋要用好多錢所以特別送左尼份禮物比我.... 真係好感動呀!!!

今日超開心!!! (但輝輝訓緊覺....我話比佢聽中左獎都冇反應.....)

PS: 我尋日用Betty行街睇不锈鋼門，發現d門原來好貴架....最平都要成4千幾蚊....一隻門都咁貴....我都係時候分配下大家可以送咩比我做入伙禮物..呵呵呵!!

再PS: 我尋日亦成功叫左我細老送部Wii比我做入伙禮物喇....

反串...

自從我買樓既消息傳出後，身邊既朋友唔係話做我既姊妹就係話做我既伴娘...最奇怪既就係姊妹同伴娘既位都有男士(?)掙黎做...尼件事令我諗起我以前睇過一套既台灣偶像劇 --- 惡作劇之吻。尼套劇由林依晨及鄭元暢主演 (其實我好鐘意睇台灣偶像劇 ^_^) 。故事點開始同經過唔重要，最主要係個結局。佢地兩個人最後係結左婚...但由於之前一個輸賭，男主角要係婚禮上做左一個突破....(見下圖)

鄭元暢反串做新娘著婚紗....連帶佢d兄弟都要一齊著...(但我找唔到有埋佢d兄弟著緍紗既劇照 )



新娘都會反串喎....變成一位帥哥....

如果大家睇完之後都係想做我既男版伴娘既話...我絕對冇問題..... ^_^

張敬軒+王苑之 友誼萬歲演唱會

今日因為表妹比左幾張飛我....所以有得去聽張敬軒同王苑之既concert. 我本人其實對佢地唔係特別鐘意...有免費飛當然唔好"sid". 點知尼個concert可以同一個字或兩個字黎形容: 差 同埋 好差。我所指既唔得兩位歌手唱得唔好，係大會d音響非常之差。完全聽唔到d歌手唱咩。不過張敬軒同王苑之把聲真係好好聽....

成晚既主菜由放音響差既關係而改變左方向.....我阿媽、舅母同美姨成為了我地成晚既主角。以下係成晚既笑位summary:
1) 澳門歌手出場打頭陣...佢地著得好唔掂，有一個仲著到小忌廉咁，真攞命......然後才哥出場...仲攞左一袋禮物出黎...開頭以為係公仔....咪大力揮手...點知原來只係一個個既網球...我地即刻冇mood咁話唔要呀....但最精彩係才哥離場果時....佢high得制所以一路pk...一路落台....笑到我阿媽同minnie反肚....
2) 坐我地前面係一班著住校服既小朋友。舅母因此就恰佢地，又叫佢地數一二三大叫王苑之個名、又叫佢地打拍子同整人浪添.仲恐嚇佢地唔做會話比佢地校長知.....最抵死係d靚仔又聽佢話....到concert中途有個捐錢既錢箱轉到過黎....舅母就冇傳過去我地果行不但止，比左個錢箱前面個靚仔....仲叫佢叫校長捐錢。個小朋友搵住個錢箱好聽話咁比左佢老師....
3) 到左尾段果三朵金花越黎越high....美姨仲一個口吹兩個bb....最後個concert從一支"友誼之歌"結束。尼手歌不嬲都係監獄歌...但係果三朵金花最識唱既一首歌...人地唱"說有萬里山"...佢地就自己係到"hey"....完全失晒儀態。最後散場時開晒d燈...佢地先知驚...仲話:死喇..比人見到佢地個樣..."

中間其實仲有好多笑料... 不能盡錄....亦因為佢地係到發神經....我地先可以有一個咁愉快既晚上....

買樓part2....

尋日終於交易成功...買左一間以前從未諗過要買既樓。買後心情如何? 其實而家有少少忐忑不安，因為未知開始供樓後會唔會有好大壓力....又唔知日後層樓跌左會唔會比人鬧"都叫你遲d先買架啦" 。其實尼句同"早知就早d買樓啦"係一樣... 尼d馬後砲既說話其實對於一個買左樓同未買樓既人係非常hurt既說話.... 有早知就冇乞丐啦.... 仲之而家要抱住個心態:樓升唔關你事，因為你冇錢買更貴既樓。樓跌亦唔關你事，因為你已經比人地更早住新樓同你而家都係住緊新樓。

權昌御庭 廚房

望狗場景 洗手間

買樓......

終於要做人生中的其中一個大決定--- 買樓。買樓真係好煩。又要講價，又要問其他人既意見，又要顧住自己既荷包，最好梗係價格合理、間格"是正"、間屋又通爽.....但世事點會咁完美......本來尋日已經可以買到一間二百幾萬既樓.... 點知峰迴路轉，又要等多一日半日先可以落實... 唉..... 本來係兩個人既事而家可以演變成十幾個人既事..... 一個人話唔好就要否決其餘十幾個人既結論。人冇十全十美，樓都一樣....有時有別人既意見係好.....但參與意見既人太多就會變成左驚驚右驚驚...永遠做唔到大事。為了買樓，個人的卑氣變差了....平時甚少鬧人既多都對了好多人開火......尼個咁重大既決定...其係希望可以盡快解決.... 若知後事如何，請聽下回分解......

年初二之人物關係表

經過一連五日的新年假，又係時候要返工工喇~

放完假仲累過未放，無他既，都係因為玩得太盡......
尋日我去我老細到拜年，佢都同我講話今日返工都係hae.......工就照返，但靈魂就不在。但一有人派利是呢，個靈魂又會好快咁反返黎.....

成個新年到目前為止，最精彩莫過於年初二係我屋企開既party. 最初都係諗住人數會係大概10個左右...點知出乎意料....大家都好比面黎玩。最初由三部NDS開始..... 人多了就開左一個board game 戰國風雲，接住又多人了就開了一枱麻雀，續而再攞埋Pictionary猜猜畫畫出黎玩，隨著戰國風雲既結束又開多一檔麻雀...... 我都覺得自己幾利害.....全場既人可以分為4大派: 1) 親戚 2) 同學 3) 同事 4)朋友。為左方便大家認識/了解/得個知字 果晚同過咩人玩，我決定做一個人物關係表:

Kiran - 唔洗多介紹
Ana - 我既小學/中學同學
Betty - 都係我小學/中學同學
Beverly - 又係我小學/中學同學
Ivan - Betty既老公
Jeffrey - Betty既前同事，係Betty個婚禮上一齊做姊妹 :p
Pedro - 我堂哥
Olivia - 我堂妹
Vicky - 我表妹 (爸爸果邊)
Mabel -都係我表妹 (媽媽果邊)
Ricky - Mabel既男朋友，又係Jeffrey既大學同學 (尼個世界真係細)
小燕 - Mabel既同學，同樣係幼稚園教師
阿芬 - Mabel既同學，又係幼稚園教師，亦係Jeffrey既中學同學 (又一次見證世界真細小)
Victor - Pedro既朋友，我係加拿加果時已經識佢
Kinny - 澳大同事，又係扶青人
Daniel - 以前Luso同事及現在澳大同事
Jeff - Luso 同事
Calvin - Ana既男朋友
阿星 - Ivan既朋友
Maggie - 我隻狗，因為好多人係到所以成晚都唔肯訓。等二朝見佢有個大黑眼圈......

數一數，原來都有成19人+1隻狗......

第二日同 Ana同Bev 食飯講開.... 以女仔年齡黎計....果晚原來Ana同我係數一、數二。我以5日之差送左個"數一"之位比Ana。 Sorry喇 Ana，用左你黎"jin"底.....我地因為咁突然之間好掛住阿Jen...... Jen，妳快d返黎啦，讀書唔好讀咁耐喇~

浪漫情人節

今年係我同輝輝既第4個情人節。其實每年都係是是但但咁過左就算。唔會話特別去食情人餐 (但每年一定會有花收 ^_^) 但今年輝輝唔知做咩咁落本，一早就扮送花仔送花到我公司。之後放工又帶我去食情人餐。再送左隻鑽戒比我...令到我有d受寵若驚。亦令到我有d唔好意思 (因為我只係買左兩件衫仔比佢，超冇心思......) 唯有新年帶佢去逗多d利是補償啦..哈哈....

<-輝輝扮送花仔

靚靚鑽戒->

靚靚花花