橫財就手...恭喜恭喜

小麒麟久吾久都買下六合彩玩下，尤其是係有金多寶果期都會買返一張半張碰下運氣，但從來都係最多中三個字 (即係中廿蚊雞)。係新年之前我見有新年金多寶，又咁岩我細老過香港，就自己劃左幾個號碼，比細老去買，一次買夠十期。平時既我都係好隨意咁寫幾組號碼就算，不過今次就唔知發咩神經特登上左香港馬會既網站，睇下過去出得最少幾號碼係邊幾個。抄晒d號碼之後就一頭一尾咁數六個字，岩岩好砌到三組，另外一組就用左我自己既心水號碼(什麼生日呀，紀念日呀，年齡呀等)。最後就得出如下圖的十期六合彩。雖然金多寶冇中，但出乎意料之外，我竟然中左四次!!!而有三次係中四個字!!!我從來都未中過四個字，連中兩次我都以為我睇錯，點知今日再對時又中....我都有d覺得自己好有橫財。新年都未過就已經中左幾次六合彩，真係一個非常好既開始。中四個字即係幾多$$$? 其實唔係好多，四個字只係得定額三百二十蚊，咁而家中三次四個字再加一次三個字都只不過係980蚊，再減返我之前買果二百蚊都係中左780蚊。所以大家唔好叫我請食飯喇....中左六合彩唔係你地想象中咁多錢架咋.....

ps: 原來中四個半字個金額已經差好遠喇.....四個半字就有四千八......比我中一次就夠喇.....

ps2: 我其實仲有一期未開架....有少少緊張添

ps3: 大家記唔記得我上年新年又有中獎呀....中左一千蚊八百伴禮卷.....係咪好jealous我呢...hohoho :p